我都做得到^^蒜香雞 + 蒜香雞油飯^O^

睇過好多關於全隻雞既食譜..睇落做法都唔算好難..成日都好想整..但..永遠就比三樣野令我卻步..醃雞..斬雞和擺雞..
今次決定挑戰佢..始終整到成隻雞..無論食既人定整既人應該都會好滿足..而且其實唔係好難整得好食架咋..一於試試..只要有心一定攪得掂..
今次係參考自網上既食譜分享..不過我自己改左少少..
(網上有太多勁既煮神喇..只要你肯學肯問..真係好多人會好大方教你架..佢地實在太可愛^o^)

 
蒜香雞 + 蒜香雞油飯^O^材料非常簡單..
雞上面係蒜蓉黎架，點解睇相似係痴左好多飯咁架>~<

 

 全雞  一隻
蒜頭  適量(足夠塞滿整隻雞囊)
鹽  適量
米  適量

所謂既適量真係睇你需求..要睇你雞有幾大?你可以吃幾咸?你有幾多人食飯?
由於下下影全隻雞我覺得好似唔太好睇..所以 d 相盡量影部份..無影全隻雞架.邊醃邊影其實真係好論盡..影得唔好唔好見怪~

 

一. 將蒜頭除皮切片..另有部份切蓉..
(原食譜係話唔使切唔使拍的..只要除皮就可..但我覺得切片和蓉去醃會更入味..一切隨自己喜好啦..)

 

二. 先將雞洗淨..要檢查隻雞仲有無毛..有就要'抆'左去..有內臓就拎走去..然後將雞內外都洗淨..用廚紙印乾雞身..
(邊整邊睇到個雞頭好似望住我咁..令我好驚..所以我斬左雞頭先..>~<)

 

三. 將適量既鹽塗抺係全隻雞既外皮上..好似幫佢按摩咁^^

 

四. 將適量蒜蓉塗抺係全雞既內外..捽捽捽..好似搽按摩油咁..記得係內外都要..特別係雞脾雞奕同雞腳位..因最後會將蒜片入晒去雞囊入面..呢幾個部份係接觸唔到蒜片的..如果唔將蒜蓉塗抺上去既話..最後呢幾個部位可能就只得咸味..唔夠蒜香架喇..(我係咁諗..)

 

五. 將鹽同蒜蓉塗勻全雞內外每一個部位後..就可以將蒜片放入雞囊入面..入到九成半滿就可以用牙簽封口..

 

六. 做好以上動作後..就可即時將全雞放入電飯煲(唔使醃好耐架..)..按煲飯制..我自己按左一次飯制後..七分鐘佢就彈左去煲好飯個邊..雞當然未熟啦..打開倒入約手指厚度既熟水..然後再按多次煲飯制..開頭我按佢都即刻彈返去煲好個邊..我就等一陣..攤一攤..然後再按就無再彈喇..大約過左廿分鐘左右就彈去煲好飯個邊..開蓋睇已熟晒喇..如果你唔急煮飯就由得佢焗住隻雞先..如果你好似我咁趕住煮飯..我就預熱左焗爐..等爐入面有 d 爐溫去焗住隻雞..記得唔使再開爐架喇..只係想 keep 住隻雞唔好咁快凍咋..因為仲要等飯熟嘛..
(原食譜係話唔使加水..按一次煲飯制就得..但每人屋企飯煲都唔同..大家要自己執生呀..萬一你屋企飯煲係按完第一次好快就彈..但又按唔到第二次既話..你就唯有即刻轉用镬隔水蒸..由生蒸到全雞熟大概廿五分鐘..如你半熟轉用镬既話..要自己減數呀..最後插筷子去確定雞熟未啦..)

 

七. 我係趕住要煲飯..所以雞熟後焗左五分鐘左右..我就將雞由飯煲拎出轉去有餘溫既焗爐保暖..飯煲入面應該充滿住雞油的..首先你將你要用既米係第二個器皿洗左先..然後將已洗好既米倒入沾有蒜雞油既飯煲..加足夠既水..將飯煲內既蒜雞油..米和水撈勻..然後就好似平時咁煲飯..飯熟後就會有好香好好味既蒜雞油飯喇..^^

 

八. 斬雞是時候..呢一 part 就要靠自己喇..因我都未識斬靚同擺靚上碟..我仲要學習呀..大家跟自己方法斬好就可以上檯喇..

**斬開雞囊後會有好多充滿雞精華既蒜片..入晒味架喇..你可以將佢地全都切晒做蓉..一方面可放 d 上雞一齊上碟..另外我留起左 d 放入盒..平時炒菜或者煲白飯時炒熱左都可以用黎撈飯..好香架^^

雖然我斬 & 擺得真係有 d 醜怪..但味道真係好 ok..而且好滑架..老豆老公同細佬都讚好味^o^
用好簡單既材料就做到..大家都試下啦..真係唔難架..只要有耐性同心機..大家都一定做到架..快 d 行動啦..

​