話咁快「肥樂b」已經十個月大,亦即是說我已轉做全職媽咪九個月多了(阿仔出世後我仍有上班一星期啊^o^)這段時間除左見證阿仔不斷進步外,其實我自己都同時學懂更多,和「肥樂b」一齊進步,大滿足。
作為一個全職媽咪,除左要照顧阿仔起居飲食外,每日陪玩都係重點,不過每日只留係屋企玩玩具實在有啲悶,樓下公園又暫時未太適合阿仔玩(阿仔始終仍是嬰兒嘛),上網見好多全職媽咪都會帶bb去playgroup玩,我決定都帶阿仔去試試,經各樣比較下,我揀左Safari kid,阿仔參加呢班係六個月以上就可以(估唔到原來咁細個已可上堂),每星期一堂,每堂一小時。
自有「肥樂b」後,發覺只要同阿仔有關既事,我就會好開心。第一日上堂,前一晚我竟然興奮到訓唔著^o^整晚就是想著「唔知聽日阿仔有咩玩?唔知阿仔聽日玩得開唔開心呢?」
到達Safari kid第一反應係「學校範圍好大,仲有波波池添^_^阿仔一定會好開心喇」 點名後正式上堂,首先miss tracy透過唱歌去介紹大家,然後邊唱歌邊做動作,當時阿仔得九個幾月,坦白佢根本唔會知老師唱緊乜?不過阿仔都邊聽邊手舞足蹈,阿仔拍手掌都係跟miss tracy學識架。
唱完歌仔就到玩老師預備比小朋友既玩具喇,幾堂入面試過玩沙、玩水、玩泥膠、玩啫喱等,我相信係中國人眼中呢幾樣野應該都未放心會比bb玩,但係外國人教導入面係比較「放手」比小朋友試探的,我其實幾認同,我..會努力學習「放手」。
玩積木玩具過後,老師會同小朋友講小故事,之後就可以出playround玩,阿仔最興奮莫過於此,
一開始miss tracy怕小朋友玩波波池會驚,叫家長可以抱住仔女落去一齊壯膽,
好明顯我仔超大膽,落到波波池無驚不特止,仲好似游水咁游游游,開心到不得了,miss tracy又成日好開心咁同阿仔講野,拍手讚佢,阿仔簡直開心到忘我境界,做媽咪見到阿仔開心我都好開心,就算成個鐘陪住陪仔玩呢樣玩個樣都完全唔覺攰,因為阿仔開心嘛。
開心既時間過得特別快,每堂既一個鐘都令我覺得過得好快,阿仔係playround除左玩波波池之外,又電單車又玩捐山窿,爬上爬落開心到不得了。
我仔非常鍾意miss tracy,肯定阿仔係未明老師講乜,但老師每次都會好友善同好好笑容咁同佢講野,我覺得因為咁,所以阿仔好鍾意佢。阿仔既同學仔大部份都係外藉bb,老師同各位家長都係外國人,我平時好少一次過接觸咁多呢,相處過後,的確覺得外國人係比較禮讓同有禮,大家既小朋友都得幾個月大,難免有想玩同一件玩具既時候,大家既媽咪見到咁既情況都會即刻叫自己既仔女讓比對方玩,比第二樣玩具自己既仔女去引開佢地唔好爭,大家係玩得好融洽和平,非常難得。
由於阿仔每堂都好落力咁玩,所以每次落堂後必定食晒一支奶就訓,見到佢咁滿足,媽咪都超開心,每次都會好有動力帶佢去玩。而且透過每堂由屋企出門到回程返屋企,我覺得除左阿仔玩得開心學到野之外,連我都成長左,我而家好有信心自己可以揹住阿仔去邊都攪得掂,我已經練習到可以企係到揹住阿仔餵奶,無位坐都無問題^_^
認真的,我真係好開心可以同阿仔周圍去,兩母子一齊學習、進步、成長既感覺真係好好,只要同阿仔開心,天腳底我都會陪佢去。湊仔唔一定只留係自己屋企附近,特別係全職媽咪更應該同仔女一齊多啲出外,挑戰下自己湊仔能力之外,又可以同仔女一齊周圍去,見到自己一個都攪得掂,仔女又玩得開心,真係好滿足架。
Safari kid hong kong
Add. : L101 Chi Fu Landmark
Chi Fu Fa Yuen
Pok Fu Lam, Hong Kong
Tel. : +852 2177 0001