一次起、兩次止～匯豐智樂遊戲萬象館

同牽牽去「匯豐智樂遊戲萬象館」，有野玩不過個人認為去一次就夠，可能咁岩有啲玩具爛左所以無左啦，煮飯仔得返洗手盤，又無左套鼓，除左相入面既玩意之外，仲有繩網同樓梯爬，不過呢啲我要扶住牽牽緊係無影相啦，仲有啲做得唔太精緻既紙皮、發泡膠玩具食物，個人認為唔值100蚊1大1細玩1次，用800蚊買30次就更加唔會，雖然話可兩個小朋友共用，但實在唔覺得呢到有趣味到令你想黎咁多次=_=佢有個「污糟貓」範圍可比小朋友畫水彩上牆，我係屋企教牽牽係唔可以畫牆，所以我無比佢玩，木波波池範圍只比24個月以下小朋友玩，但其實木波波都幾危險，小朋友好易亂掉，掉到人我唔想，比人掉到就更=_=

#同牽牽出外找樂趣

#有期望就有失望

#千鬆啲我可以買迪士尼閒日年票

#九百幾我可以三百六十五日任去海洋公園

#憑咩收我八百黎三十次恕我唔識欣賞

#一百蚊一次得呢啲真係幾貴

香軟雞蛋糕...v仔同焗爐都得

對於鍾意煮野食既我黎講，可以比我「亂馬行空」去諗整咩比仔仔食，其實真係好開心，全職媽咪既我而家每日都同牽牽一齊真係好開心，雖然牽牽開始有自己既性格，有時都會激到我好忟（例如我好比心機整野比佢食，佢bu返晒出黎，真係會唔開心的，不過一陣就無事喇，小bb嬲佢唔落既^_^）不過我真係好鍾意自己個仔，每一刻同佢一齊都覺得好幸福^_^

今日整左軟綿綿既蛋糕仔比牽牽食，細細粒岩晒佢手仔拎，牽牽捧場之餘，連爺爺都話好好味，又軟又香雞蛋味^o^

香軟雞蛋糕

材料：

蛋 3隻

糖 20g + 20g （我用黃糖）

菜油 24g（我用米糠油）

鮮奶/配方奶/母乳 60ml （我用鮮奶）

低筋麵粉 60g

做法：

1. 將糖20g、油24g及微溫鮮奶攪勻至糖粒完全溶解無粒粒

2. 將蛋白蛋黃分開，蛋黃倒入（1）中

3. 麵粉過篩至（2）中，攪勻至無粒粒

4. 將蛋白和另外的20g糖用電動打蛋器打至倒轉都不會倒出狀態

5. 將（4）分3-4次以輕力加入（3）中攪勻

6a. 有v仔（Vitantonio 窩夫機）/三文治機就預熱後，掃油，倒粉漿入模，蓋蓋，2-3分鐘開蓋用牙簽插入蛋糕，牙簽拎起無粉漿即成。

6b. 無v仔就將粉漿倒入焗杯（即棄紙杯不用掃油，其他要），預熱焗爐後，150度焗20-25分鐘，用牙簽插入蛋糕，牙簽拎起無粉漿即成。（留意：用不同模焗，時間會有所分別）

**今日1個蛋糕粉漿，我試了3個模焗，都幾好玩丫，原本想用埋鯛魚燒模，不過要睇住阿仔，所以無再攪咁多。

**我覺得可試用電飯煲掃油，然後將粉漿倒入，按煲飯制，彈制後應該都好味的，我未試過，但我覺得都不失為一個懶人法，下次試試先^_^

15個月的牽牽

話咁快前兩日牽牽就16個月大喇，今次好唔岩，連媽咪都唔記得左10號牽牽又大一個月添（個日去左拜山，又去左捧邦邦場，老喇，原來真係記唔到咁多野）琴晚即刻補返同牽牽食蛋糕同唱歌^_^唔好問我點解個個月都要慶祝啦，我得一個仔之嘛，搵藉口開心下，唔好咁計較啦，而且形式黎既姐，做左大家都開心，所費無幾，無所謂啦。

牽牽踏入十五個月又進步左好多喇，不過亦都變得好快。一開始十五個月突然胃口好返晒，我估佢其中一邊大牙終於爆左出黎，舒服返啦。

點知唔好得幾日，又試成日無胃口，原來另一邊又爆大牙，一見佢唔想食野，我就又擔心又煩惱，做媽媽既緊係唔想見到小朋友越黎越瘦啦，但成日無胃口只食奶奶，想肥都難。唯有又攪下花臣氹佢食多少少，魔法叉叉同有生命既食物，都會令佢肯食返少少。

另外，因為又爆大牙，佢夜晚成日醒，而且可能食得少野，始終肚餓啦，而家晚晚兩點幾三點都要起身食奶，無法啦，唯有照做住先，希望爆晒啲大牙出黎後會好啲，牽牽訓唔好，媽咪自然都訓唔好啦，狂爆瘡=_=

又可能因為爆大牙，牙肉唔舒服啦，佢成日合埋口唔肯刷牙，一日刷三次，我就勞氣到呢，又唔可以唔理佢，但真係次次都好勞氣，為左令佢肯乖乖刷，特登買唔同既牙刷比佢，始終佢唔識講，我只能夠樣樣方法都試下，試到佢舒服乖乖為止。

今個月我地有幾樣新野，為左拎叮噹個獎牌比佢，我參加左叮噹馬拉松^_^，其實主要等如拎錢買產品姐，跑少少之嘛，見到牽牽攬住個大叮嚀同獎牌係咁搖好開心，媽咪做乜都值得啦。

我又帶左牽牽去朋友屋企玩，佢超開心呀，connie兩個女既玩具對牽牽黎講好新奇，巧瑤又好錫牽牽，玩得超開心呀。

另外，我地第一次同牽牽出門上福州玩，叻叻豬坐左五個幾鐘頭車都無扭計，抵讚，又無水肚不服，竟然無影響腸胃，一樣有屎屙，勁過大人呀，睇見牽牽玩得咁開心，我都好開心，同埋公公婆婆舅父一齊去，牽牽超開心。

我留意到似乎當牽牽訓係我同爸b中間（同一張床，牽牽係會無咁反訓呢）

係福州，牽牽落床既能力非常靈活，我真係好開心佢有聽我教佢，點樣安全落床，（見佢落得咁好，我真係好開心架，個份開心感，可能真係媽媽先會明）佢學識落床，就可以減低佢跌落床既機會，唔好睇少呢個動作，對幼兒黎講好重要架。

有開心當然都有唔開心啦，牽牽十五個月大第一次「起樓」呀，唉，教掂佢落床，但都仲有好多機會會跌親架，個晚我要上網交水電媒，叫爸b睇住牽牽，點知..結果牽牽「中」左落地，我即扶起佢，額頭已經腫起左喇，做媽咪既緊係超心痛啦，再出聲鬧都無意思，我幫牽牽敷冰墊，好彩個晚都退咁啲腫，而爸爸都好內疚，咁算啦，都唔係有心既，下次小心啲就得啦。牽牽都幾犀利，喊左一陣就好似無事發生咁繼續玩，媽咪流既眼淚仲多過佢。

總括下牽牽15個月識左啲咩先：

用手拎野食完全無難度喇，叉都用得好好喇，匙都唔錯，不過未係最好啦當然，仲有進步空間。

落床落得好俐落，擔心少左啲喇。

識執lego入箱，希望可以快啲識執埋其他玩具啦。

叫「爸爸」非常清楚。

識著拖鞋行得唔錯，不過總有甩漏時。

識自己由房執起尿片行去垃圾桶掉，見到佢由唔識學到識，我真係好感動架。

識用膠鑊鏟學我炒餸。

識飛吻，give me five，錫人一啖（冧死人^_^）

其實每日都會見到牽牽進步，做媽咪真係好滿足架，雖然湊小朋友係又氹又勞氣，不過亦都好開心同滿足，每日同佢一齊我真係覺得好幸福。