一直都好想買隻「啜」實啲，唔好咁易推跌/反既碗比牽牽，琴晚爬左成晚文，今日即刻同牽牽去mothercare買，其實都搵到有團購，我要個款賣113，如要快遞就加22，不過起碼要7日後先出貨（咁要個快遞黎做乜？）令阿仔進步、學習，我一秒都唔想等，我寧願用錢買時間（十幾蚊我都仲豪得起既）今日買完今晚即用，買左兩隻吸「啜」款，一隻屋企用、一隻係婆婆到用（一個月起碼都返婆婆到兩至四次，每次兩日嘛）每隻128，另外再買左隻細啲既，呢隻45，諗住大啲要黎擺湯（無計啦，鬼叫之前一田bb展時唔識呢隻碗咩，唔係可以平啲啦。今晚試用，效果一流，的確「啜」得好實，不過今晚唔係食飯，未試到係咪點都唔會「but」瀉。
琴晚開始同牽牽blw，佢識玩啲食物，但好似唔記得左係可以放入口食咁，但我放入佢佢又識食喎，明明平時都有比佢自己拎野食放入口架？唔知點解琴晚成碟放係佢面前，佢又唔太主動放入口呢？唔通太多有壓力？今晚用calibowl同埋比隻匙佢再試，我覺得效果好過琴晚喎，起碼佢都有用手放入口食幾啖同埋用匙「but」入口，太好喇，每日進步一啲，希望好快就可以自己食。（就係因為嬰幼兒每日都係到快速成長，所以我覺得係唔可以拖/耽誤佢地既時間，團購要等知7日實在太奢侈喇）
原本想同牽牽去買埋baby color，不過要行落家樂，然後又要上返黎新世紀搭車返屋企，我前揹住牽牽，後一個背囊，無力量行咁遠喇（畢竟牽牽成廿二磅，唔野少架），唯有擇日再買啦，橫掂水畫布都係畫左兩日之嘛，baby color都唔太趕既。
作為全職媽媽既我，每日都好想同阿仔充實啲，但又唔可以安排得太多，始終佢仲係bb，玩幾個鐘就要抖抖架喇，而且我唔想因為成日同佢出街而攪亂佢便便（我仔似乎係如忍到都會揀係屋企先屙個隻，今晚我六點幾同佢返到屋企、一落揹帶，佢鞋都未除，就聽到佢「唔唔」聲了^^）需知道每日有無便便係好重要呀。
今日仲同牽牽試埋用飲管杯飲奶奶，佢個招積豬仲係屋企邊行邊飲，比佢笑死，不過一到眼訓奶始終都係要用返奶樽先比到安全感佢，唔緊要啦，一步一步黎啦。
我總希望自己可以做到個稱職既媽媽～
