V仔煎西多...Vitantonio 窩夫機

自從有左阿仔之後，生活真係唔同左好多，照顧自己可以好求其，肚餓至搵野食，拎起手有盒餅就當一餐都無問題，但肩負起媽媽呢個身份後，就乜都要認真啲喇。
而家每餐就算唔想煮都要認真為牽牽選擇，太重味唔得（始終牽牽仲細，15個月），太無營養唔得，左揀右揀可能都係覺得係屋企煮簡單野算，見屋企仲有袋就就過期既方包，蛋、奶、糖，自牽牽加固後，呢啲又屋企必備，一於整西多啦。以前用鑊煎就一定要用多啲油，而家有v仔（Vitantonio 窩夫機），掃少少牛油就得喇。

V仔煎西多
材料：
方包 2片
蛋 2隻
鮮奶/配方奶/人奶 50ml
糖 適量（我用黃糖）


做法：

1. 預熱v仔/三文治機，將蛋打散，然後加入奶及糖攪勻。

2.窩夫機/三文治機兩邊盤塗少少牛油，將方包兩片蘸滿蛋液，多餘蛋液掃走，然後將方包放入窩夫機/三文治機，之後蓋蓋。（不要水滴滴般放落窩夫機/三文治機呀，太濕怕會把液體流入發熱線就會燒機架喇）

3. 待三至買分鐘，開蓋，用筷子反一反塊西多，烘一烘另一面，兩面金黃即成。

4. 夾起後最好放涼架攤一攤，唔好即上碟，就可避免，倒汗水出晒係碟底，咁就唔會攪到塊西多濕笠笠啦。

5. 隨個人喜好加煉奶/糖漿/蜜糖吃都得

若想如我般加金莎醬（其實各類型朱古力都得，我仲鍾意用薄荷朱古力），就可以係反轉塊西多烘另一面時，順便「練碎」粒金莎朱古力，均勻咁鋪係西多上，靠v仔熱力「金莎就會開始溶溶地，你再用刀仔輕力塗勻係西多上就攪掂喇。（新年後，相信大部份人屋企都會積存各類型既朱古力，攪一攪花臣就可以輕易消滅佢地啦）

**如預備既蛋液最後用唔晒，唔好晒，倒埋落v仔煎埋去，當煎蛋吃之嘛^o^

**少少地咁比小朋友食都唔怕啦，又唔係成日食（≧∇≦）

**無呢啲窩夫三文治機用平底鑊煎都得，唔想落太多油就放張烘焙紙係底先煎啦，不過要小心煎燶張紙呀。

體貼照顧日常需要...Watsons 小王子系列

自從有左仔仔之後，選擇一切都會比以前小心，始終幼兒一切都比大人敏感，係可能情況下，做媽媽當然會為仔女選擇較安全既產品。

而家有好幾樣日用品係經常性使用，紙巾、濕紙巾、棉花棒等等..都係每日消耗量奇高。以前從沒理什麼有沒有使用螢火劑？根本就唔知乜野係螢光劑，但有仔仔後，就知道螢光劑係對小朋友唔好的，所以一定要留意清楚，還有一點，以前我從不會用有公仔圖案包裝的紙巾，雖然我並不是走型格路線的人，但都不想別人覺得我幼稚嘛，但現正則完全相反，需知道一樣有公仔圖案的產品，絕對能令你家的小王子/小公主安靜下來，在外有時他們不受控地大叫大喊，一包可愛的紙巾絕對可救你一命，免卻途人向你下注目禮的尷尬。

早前收到幾件由Watsons推出既「小王子系列」日用品。

我家小王子當然要第一時間審視下啦，你睇佢玩得幾開心，仲即時同爺爺分享添。

Watsons「小王子綿柔細緻迷你紙手帕」hkd 14.9/20包

以原生木漿製成，紙質柔軟平滑、細緻柔韌，無添加螢光劑，隨時隨地細心呵護您的需要。

背囊放住幾包「小王子」紙巾除方便我同仔仔出街隨時有得用之外，用黎止住阿仔唔好扭計都非常有用，因為包裝靚靚，小朋友好簡單，顏色鮮豔已可以吸引佢玩一餐，而家比其他無公仔既包裝紙巾佢玩已經唔so我喇，激氣。

Watsons仲會推出「小王子玫瑰潔膚柔濕巾」添，一pack有三包，每包有十片。

細細包輕便易攜，係我而家去邊都要帶既必需品，不過要四月先推出呀。

至於係屋企嘛，盒裝紙巾都用唔少，Watsons「小王子綿柔細緻盒裝面紙」hkd 26.9/5盒

採用原生木漿，紙質柔軟平滑、細緻柔韌，不含螢光劑，咁就可以放心使用啦。

小朋友最鍾意拎盒裝紙巾黎玩，我個仔又點會例外丫。

另外，「小王子系列」仲出埋粉紅色棉花棒 hkd 11.9/200支

粉紅色棉花棒真係岩晒我呢個粉紅控媽媽^_^（雖然我生既係仔仔，但我都好無論如何地係仔仔身上可能情況下都使用粉紅色架，哈，邊個話男仔唔用得粉紅色架，我仔著粉紅色都不知幾靚幾可愛^o^）

棉花棒除左岩女人化妝卸妝外，

我平時都經常性用黎幫仔仔清潔架。

產品與資料由品牌提供。

每人喜好不同，感受有異實屬正常。







 

Q版「糖醋麵」..Vitantonio 窩夫機

新模終於返左，當然急不及待要攪攪新意思啦，係啲模未返之前，我日日都會諗「啲模返黎後，我應該整啲咩好呢？」

我即刻諗起係上海鋪食到既「糖醋麵」，同上次蛋角一樣，「糖醋麵」又係一個我試過用平底鑊煎，結果都唔太成功既菜式（雖然散開加糖加醋都好好味，不過唔成形始終無咁好睇），我又唔想落太多油，但落得唔夠油，係鑊煎咁耐又驚會燶，煎得唔夠耐又會散，總之就有難度啦，今次我用v仔（Vitantonio窩夫機）既pancake模試試先。

Q版「糖醋麵」

材料：

麵餅1個（起碼可煎6個）

糖 適量

鎮江醋/意大利黑醋 適量

做法：

1. 滾水落麵，煮5-6分鐘後撈起過冷河。

2. 鋪廚房紙，揚散麵條，索乾水份。

3. 預熱v仔（pancake模），將適量麵條鋪於圓形模上。

4. 鋪好後蓋蓋，10-12分鐘開蓋用木筷子輕搖麵餅，若已定型沒有散就小心反轉兩邊麵餅，然後再蓋蓋，8-10分鐘開蓋再用木筷子輕搖麵餅，若沒散就可上碟。（若有散開，就蓋蓋過1-2分鐘再用木筷子輕搖麵餅檢查定型情況）

5. 上碟，隨個人喜好加入糖和鎮江醋/意大利黑醋後，即可享用。

我今次用左蝦子麵，因為屋企有係到未食晒，費事再落街買普通麵餅了，糖我係用黃糖，因細佬話白砂糖無咁健康喎。我自己覺得「糖醋麵」係睇落簡單，但又唔易成功既菜式（難怪咁少材料係上海食肆都要賣60蚊以上），最緊要有耐性，因為真係要煎一定時間先會定到形唔散，兩邊脆卜卜，中間仍有麵條本身既質感。

用v仔定形已經易好多，大家不妨都試下整啦，真係幾好食架，連我仔都追住食呀，不過始終佢咀仔細，一剪開麵餅就碎開散，我唯有用手餵佢餵啦，脆卜卜小朋友緊係鍾意啦（≧∇≦）無v仔既朋友都可以用平底鑊煎架，不過就考功夫小小（雖然話用烘焙紙墊住煎就可唔用油，但每邊都煎10分鐘以上，我怕張烘培紙會有燶燶既感覺，如用平底鑊，我建議都係落油煎好啲）

同師公拜年

跆拳春茗，帶牽牽同師公拜年，睇得出除左師公好錫牽牽之外，同場好多女仔都好鍾意牽牽，做媽咪見到好多人鍾意自己仔女緊係開心啦。

牽牽玩左人生第一鋪既魚蝦蟹，輸左，不過師公竟然都賠返錢比牽牽，哈，咁著數既^_^

牽牽得14個月無心機坐成晚食飯啦，所以拜完年，我同佢去觀塘，爸b就留底食飯。七點幾走，牽牽就訓著喇，去到apm三聯買買下書就醒喇，之後同佢落無印再去一田就走喇，一心諗住實會買好多野啦，點知只買左本書就乜都無喇，仍然搵唔到日式打邊爐片薄年糕片添，去大阪時入多啲貨先得。

V仔煎蛋角...Vitantonio 窩夫機

做左人媽咪，自己唔食都要煮比仔仔食，牽牽只得14個月多啲，又唔可以食太重味，但太淡佢又唔食，而家仲要學識bu野，總之唔岩佢個一刻口味就會bu，佢而家出緊大牙，牙肉又會痛，好多時食左入口啜晒啲汁就會bu返啲食物出黎，攪到我真係好頭痛，但無法啦，做媽咪唯有試多啲唔同野去吸引佢，引起佢食慾（無可能佢唔食就由得佢架嘛，佢已經14個月，唔可以只食奶奶，會唔夠營養同唔飽，做媽咪絕對唔想見到阿仔越黎越瘦呢）

買v仔(Vitantonio)最大原因都係因為想整多啲花臣引牽牽，其他模仲未返，唯有玩住跟機個幾個先啦。

今晚整左「香煎蛋角」，呢個餸我自己好鍾意食（我係蛋痴嘛），但一直都好怕會煎到又油又成唔到形（我好怕太油），而家又訓練緊阿仔blw，所以要整啲可以比佢用手拎到黎食既野，v仔就真係好幫到手喇。好開心阿仔鍾意食仲無bu返出黎，太好喇（而家每次同仔食野真係好煩惱，佢肯食真係會超級開心）

香煎蛋角（以下分量可煎7件蛋角）

材料：

蛋3隻

洋蔥1/4個

免治豬肉40g

做法：

1. 免治豬肉用油、鹽、糖、粟粉先醃15分鐘

（由於免治豬肉分量較少，加上我係整比14個月仔仔食，所以所有都係用少少就夠，大約每樣1/3茶匙）

2. 1湯匙水落鑊將洋蔥切碎粒炒至半透明，再落已醃免治豬肉炒勻（免治豬肉炒至8成熟）

3. 預熱三文治模，倒半成蛋液然後將已炒好洋蔥肉碎平均放下，見蛋開始離邊，就將另外既蛋液倒滿模。

4. 蛋再次離邊、中間半熟狀況時可用筷子夾起反轉，烘一烘另一邊（大概6-10秒）就可上碟。

放涼幾分鐘就可以比仔仔拎上手食喇，唔油又煎得靚，v仔（Vitantonio)真係太岩我呢啲唔鍾意油膩、未太掌握到煎奄烈之類既人用喇。