胡生嫁女喇，
胡太fit到爆炸，佢啲長衫款又靚著得又靚，果然係靚太。
牽牽今晚第一次去飲，佢應該覺得有啲新奇但又有啲悶，佢有話姐姐啲衫同媽咪之前個啲好似，因我比過結婚當晚既相佢睇嘛，牽牽仲好俾面話覺得媽咪粉紅色個條裙最靚添XD
原本都有諗過不如著靚啲？不如唔好用背囊，但計計下都係好多野要帶，而且有時牽牽嗲嗲豬要抱，始終背囊會最方面，咁就著返便服算啦，方便嘛，幫牽牽扮靚算喇，係淘寶搵到套我覺得好可愛又有型既夏天西裝仔，牽牽身型唔肥著乜都唔會難睇啦，媽咪當然覺得自己個仔著得好型啦，今晚都好多人讚佢呀，我眼光都唔錯丫XD
臨訓牽牽仲話「媽咪，聽日我想再著'波士bb'套衫（佢話波士bb著西裝嘛）」我話「點解想再著既？你想著去邊呀？」佢話「因為覺得好靚，不如再去飲。」我話「聽日無人請我地飲喎XD不過你想著既話，都可以再著既」小朋友就係咁可愛直接，我真係好鍾意每刻都可以同牽牽一齊，感覺好得意好幸福（雖然有時好攰，但我真係好感恩我可以成日同牽牽一齊）
自從兩年前新年見過華力班同事後，今晚係咁耐以黎第一次見，大家一齊做左咁多年野，而家各散東西，難得聚埋一齊，原來係會有啲感概同唔捨得，仲有啲懷念以前一齊做野既日子添。
今晚牽牽算乖，無乜得點玩，成晚都幾合作又無扭計，係有少少怕醜，不過都好有禮貌，同今朝睇醫生一樣，我已經好心足，做媽咪既，聽到人地讚自小朋友乖，唔多唔少都會好安慰，雖然牽牽有時都頑皮。
