19/05/14 開心tea

牽牽17個月喇，我開始覺得要同佢去多啲街，接觸多啲外界，人和事都要接觸多啲喇，係牽牽未出世之前，媽媽會個啲我又無乜點接觸，攪到牽牽出世後，我想佢同多啲差唔多年紀既小朋友玩都有啲難度咁，出去玩playhouse個啲，暫時發覺都係玩完一次就byebye，好難話會有keep聯絡個啲囉（我的確要負好大責任既，講真，交朋友除左細個兩個溝通到，大人都要架嘛，但邊有時間溝通唧？咁都未溝通點會貿貿然就變到好熟喎）

難得一直識開既朋友都有同牽牽差唔多大既仔仔，咁就最好啦，因為大人已經有基本認識係到嘛，只要睇兩個細既玩唔玩得埋就可以喇。

約左amlute帶埋仔仔一齊去荃灣食tea，閒日食tea真係幾爽，無咁多人，好彩兩個小朋友又好合作^_^我地都傾到啲計喎，兩個小朋友都玩得埋喎，之後陪我買船襪（變態架，本身啲襪一路行一路sir落腳板底，最憎）我真係太耐無行街喇，原來連襪都有超超超多公仔選擇，咁呢期當然係揀我仔最愛「美國隊長」啦#阿媽為左阿仔可以有幾傻，全部牽牽揀架，開心到呢～

之後去左一田超市，我最鍾意行超市睇下有咩新野可以煮比牽牽嘛，好彩amlute 又肯陪我行，原來閒日行呢啲大型超市係有好多試食架，可能因為我地都帶住小朋友，啲姨姨對我地超好，樣樣都比我地試，兩個小朋友又好乖好合作，樣樣都食得好開心滿足，仲引到其他客人埋黎睇^_^姨姨好人到，叫我地比個樽佢斟啲飲品比小朋友飲，真係太好人喇。

好開心買到牛肝箘，可以煮飯比牽牽食喇，我真係好想自己廚藝叻啲，可以令牽牽食得好啲，大隻啲，有營養啲呀=_=

今日真係好開心，希望amlute 同仔仔都覺得係啦，咁我地以後可以成日約出黎一齊玩一齊食喇^o^

今仲有另一樣開心係，我終於交換好晒成套7-11x le creuset餐具喇，超好彩遇到好人abby幫我手交換，同牽牽去葵芳同佢交收，好好人呀。

又原來九龍返荃灣港鐵站既話，升降地係要搭員工入面個架，要有專人負責開門關門，然後到左係office入面黎，要帶返我地出大堂再幫我地「嘟」返八達通架喎，真係唔推bb車去荃灣站都唔知呀。

食得少又擔心，食得多又擔心

做左媽咪已經17個月有多喇，但「媽媽應該點樣做？」呢個問題基本上每日都仍在思考中，可能我天份低啦，對我黎講，真係每日都仍在學習中，我真係覺得自己仲未掌握得好好=_=

一早我個心係認為，牽牽一定會似我一樣咁為食，的確佢對於「香口野」係絕對為食鬼上身架，但講到正餐嘛，我唔知究竟因為「仲出緊牙仔所以耐唔耐仍然會牙肉痛丫？」「啲野煮得唔好食？」「根本唔鍾意食呢啲？」定係其他？總之到呢一刻，每次比牽牽食野我都會隨即望下佢會唔會bu（香口野除外），呢點真係令我好煩惱同擔心。好多時佢又bu，然後仲合埋個口唔食，或者食左少少就開始伸手玩食物，我就要諗「屋企今晚仲有咩食物可吸引佢食返飽啲？」「食咁少邊飽唧阿仔？」每次咁樣，臨訓個餐奶我就會同牽牽傾計，同佢講「你食咁少會越黎越瘦架，你不如話比媽咪知，整乜野會岩你胃口多啲？媽咪配合你丫。」雖然佢唔識講野，但我每晚都會話同佢講下「每日回顧」

前兩晚牽牽真係食得好少，到呢兩晚佢好似真係有聽到我每晚同佢講心事咁，真係食返好啲，今晚仲食左好多添，然後我又驚佢食咁多消化唔到，臨訓餐奶時我又同佢講「今晚食左好多飯飲左好多湯喎，你會唔會太飽架？不如唔好飲咁多奶奶住啦」連自己都覺得自己煩，點呀你？阿仔食得少又擔心，食得多又擔心？咁一條人命黎架嘛，佢係我寶貝仔，佢仲咁細，我緊係有責任保護佢架啦，我會認為佢咁細可能唔識幾多先叫岩自己，我會怕因為我既大意而攪到佢唔舒服囉，我諗呢啲外人眼中多餘既擔心，真係只有媽媽才會明。

為左可以吸引牽牽食飯食好啲，我都買唔少得意既餐具同整食物既小道具，希望咁會幫到手啦。