Angel in Jacobland: 2016

2016年11月8日星期二

比屎公公蝦>~<

牽牽前兩日屙屎屙得好唔舒服，成日都有急既感覺，但就屙得少少，陰公豬屙到佢自己都識話petpet痛，最慘係攪到佢無覺好訓，凌晨三點都突然有屎意要起身，個晚屋企無凡士林，決定用bb油頂住先，幫佢搽落petpet窿附近，等佢無咁乾，唔使屙到咁痛同埋順滑啲，希望啲屎可以易啲出到黎啦。其實作為媽咪既我，都唔識點幫阿仔搽，我都有啲驚唔知點攪好，不過見到牽牽咁辛苦，點都唔可以唔理唔幫佢，唯有大膽試試啦，好彩牽牽都好乖，我知我幫佢搽時佢都有叫過petpet痛，但佢真係好乖，無縮，知佢係忍緊痛，真係好叻仔。然後陸續都一個鐘又急又屙啲，終於日頭屙到粗大啲既，之後就無再叫痛喇，希望以後都唔會再比屎公公蝦啦。

2016年10月28日星期五

風癱又來了

上年差唔多時候又係咁，可能牽牽有轉季敏感既問題(￣∇￣)一轉涼就出風癱，好彩我見佢好似唔痕，但佢見到自己手仔一點點可能覺得唔好睇，都有成日摸，我唯有同佢講唔好摸，無事既，好快散架喇，當然一陣佢又唔記得又摸啦^_^>~<希望快啲可以好返啦。

同上次一樣，到夜晚又會勁啲，一激動喊又會勁啲>~<

2016年10月27日星期四

陰影

上星期牽牽扭計爆喊，所以無過嫲嫲到食飯，我覺得係因為佢仲記住上次俾人鬧，又可能係仲記住姑丈會係到（佢一時時，有時好鍾意同如丈玩，但有時又驚到喊>~<）

今晚我地又過嫲嫲到喇，事前我特登唔提，夜晚落街時我都只係話落街食飯，一切都相安無事，點知爸b一話我地過嫲嫲到，牽牽就即刻邊行邊扁咀，拍住心口仔話驚驚，我邊行邊同佢講其他野分佢心，叫做安撫左佢。到商場都仲無事，一到搭lift上大堂佢又開始拍心口話驚驚，要搵我抱，我同佢講「唔使驚，媽咪係到陪住，無事呀，唔使驚」然黎住程都要我拖同抱，當然佢越行就越驚，邊行邊叫驚驚同埋開始喊，唯有慢慢氹啦，出lift當然開始喊啦，入屋都仲係咁，避開嫲嫲目光走左去梳化，我陪住佢，安撫下佢，氹下佢，開頭都唔肯去食飯個邊，氹左一輪終於乖乖去食飯飲湯，今晚食得好乖，好晒所有野，仲食左好多餸，飲左兩碗湯，總算無再扭，希望佢快啲忘記過去，唔好再驚啦，唔係都唔知點好喇。

今晚得嫲嫲同表哥，唔太多人，總算易攪啲，下次姑媽姑丈係到，唔知又會點？希望無事啦。

小朋友真係好好記性，真係唔好隨便爆鬧佢，佢真係會驚會有陰影架。

2016年10月17日星期一

「0鈉」意粉媽咪放心煮..Delverde多維尼意大利粉

我非常鍾意煮野食，好有興趣樣樣都學煮，但自從牽牽出世，開始全職媽咪生活之後，好多時都有心無力，環境唔容許我好自由咁研究，但又好矛盾，我其實每日都要煮比仔仔食，但因為時刻都要湊住佢，牽牽而家只得22個月大，每刻都要睇住，睇少眼都會有危險，根本唔容許我慢慢煮，我可以做既就係，要煮得快、煮得好食、有營養得黎又要方便，意粉會係我經常既選擇，最重要係牽牽鍾意食粉多過食飯好多（≧∇≦）

【Delverde多維尼意大利粉】新包裝「水滴形」設計，突顥其以無污染清泉水製造的決心。品牌始於1967年，惟一廠房設於意大利國家公園內River Verde河畔。

- 100%意大利製造

- 採用意大利國家公園零污染天然泉水 (全球唯一廠房設於國家公園內)

- 銅質意粉器製造，使意粉表面充滿微細抓痕，把醬汁吸得一滴不留

- 甘甜清澈的泉水與優質杜蘭小麥的完美結合

- 低溫慢速烘乾，保留了小麥的營養及口感，為您帶來Al dente般煙韌口感

我用「浪型速煮千層麵 (Lasagne wave)」整左肉醬千層麵

今次我用Le Creuset焗盤焗，首先要將焗盤浸半個鐘頭水，咁就唔怕一陣入焗爐高溫而焗烈個焗盤啦。

傳統既千層麵係要搽埋「白醬」，咁首先預備左「白醬」先啦，我特登煮多啲，因「白醬」可放入冰箱留返下次煮意粉、焗飯用。「白醬」好好用架，有左呢個底醬，之後煮野時加少少其他材料就可以變化到好多其他菜式，總之呢個西式底醬學左就無蝕底啦(≧∇≦)

牛油 50克、低筋麵粉 50克、鮮奶 500毫升

開細火溶牛油，倒晒麵粉（唔使過篩）落去熄火，用手動發蛋器不停攪，令兩者完全混合埋一齊，然後開細火倒鮮奶落去繼續不停攪，落少少鹽、黑椒作調味，直至感覺稠身就完成喇。（一定要不停攪同專心煮，因好易燶底架，好快就煮好架喇）

整好「白醬」就輪到煮「肉醬部分」

洋蔥，甘筍各1、蒜蓉適量、免治牛肉 300克、罐裝蕃茄 1罐、千層麵 6-7塊、碎芝士 1包、牛肉湯 300毫升、茄膏 1湯匙、鹽、糖、香草適量

免治牛肉用啲碎黑椒醃最少十五分鐘、將洋蔥、甘筍、蒜蓉切碎、炒香再落免治牛肉繼續炒，（唔好炒太耐，因之後會繼續煮，怕牛肉煮太耐會'鞋'同'實'）

牛肉變色就倒整罐蕃茄落去，

然後落茄膏、牛肉湯，落鹽、糖調味，目測佢地已融為一體就再落香草，有時間就細火炆40-50分鐘，咁就入晒味，啲汁會收得稠啲，我無時間，所以只細火炆20分鐘就開始層層疊。

煮好晒肉醬，就200度預熱焗爐10-15分鐘；然後處理千層麵，佢係市場上唯一無需預先水煮及*有波浪形既千層麵，所以我只係煲熱左啲水，浸落去一分鐘左右就拎返上黎攤，一包真係幾抵食，我整左一盤大一盤細都只係用左六七塊左右，仲剩半包可以留返下次煮。

*波浪形設計原來係方便每層麵中間可以hold住更多意粉醬架。

放一片千層麵，落「肉醬」、芝士、白醬」，然後重覆以上次序再落，直至到焗盤邊，當然最面個層一定要係芝士啦，記得啲肉醬一定要覆蓋晒千層麵，否則外露千層麵就會焗到好乾架喇。

180度焗20-25分鐘，咁就食得喇。

我鍾意呢隻千層麵質地無咁單薄，咬感好好，唔會太淋身，處理亦好方便，熱水浸一陣就用得。

我用「4號有機意粉」做白汁粟米蘑菇腸意粉

之前特登煮多啲「白醬」，咁我地只要係雪櫃拎返出黎解凍就可以有底醬煮啦；材料部份主要針對牽牽鍾意食咩就用咩，仔仔大過天嘛，而且打風落雨無得落街，雪櫃有咩就煮咩啦。

蒜蓉，粟米，蘑菇，煙肉，台灣腸全部適量、意粉半包、芝士 2片、鹽適量

落鹽煲滾水落意粉煮10分鐘左右，盛起備用，倒少少油落去撈一撈意粉，等佢唔好痴埋一堆，留返一啲之前煮意粉既水備用；

凍鑊落煙肉、台灣腸炒香後盛起（唔使落油，因煙肉同台灣腸本身有油，開鑊遇熱後就釋出油份啦），原鑊再炒蒜蓉、蘑菇、粟米，煙肉、台灣腸回鑊，

倒白醬一齊煮，如太稠可逐少加之前留起既煮意粉水落去，然後加2片芝士繼續煮，芝士溶後可試味，落鹽調味，落意粉一邊撈，3分鐘後熄火，如未撈勻就熄火繼續撈，攪掂就上碟食得喇。

意粉同千層麵一樣都係質地有咬感唔會好淋，我同屋企人都好鍾意，意粉同醬汁都非常融合，唔會出現粉還粉，醬還醬情況。

特別值得一提，多款Delverde既意大利粉都係0鈉架，有小朋友既我當然煮得放心，即刻介紹其他bb媽咪買啦。

為食貓牽牽未等上檯就要試味先喇（≧∇≦）

產品與資料由品牌提供

如對產品有興趣可到以下網址作進一步暸解：

http://www.delverde.com/hk

https://www.facebook.com/PastaDelverde/

2016年9月25日星期日

啖啖不得了（≧∇≦）四季文昌

呢到個環境真係贏晒，希望可以keep到一直咁靚就完美喇，呢到又大樓底又高，裝修又靚，連所有裝飾品都好有內涵，老公話啲擺設都唔平，唔係求求其扮野架，呢到咁大岩晒我仔無耐性時同佢周圍行參觀，牽牽仲特別鍾意個電話亭，企入去開心到呢～其實除左環境靚，呢到啲食物都「不得了」，就講打邊爐部份，真係湯底好，就食乜都好味。

用椰子水做湯底真係好味到一個點，你係絕對會有想成個湯底啲湯都飲晒既衝動架；

我地叫左原味椰子雞鍋（半隻）一入口只能說句「你想點呀？真係好味到唔知佢想點」雞肉肥瘦適中，肉質嫩滑，略嫌隻雞比較細隻，如果大隻啲一定仲滿足。

每檯檯面都有個漏斗，一落雞侍應就會反轉漏斗幫你計時，漏晒啲沙岩岩好七分鐘，呢個時間就係店主覺得啲雞最好食既程度喇。

店員推介要將桔仔既汁唧落豉油再蘸雞，會帶出雞既鮮味，同單單用椰子水煮熟雞肉比較，又有另一返風味。

一開始我地仲叫左個小食蜜汁糖蓮藕，我覺得唔好食，一來蓮藕粉既，我最怕，二來佢完全唔入味，同啲蜜汁完全唔夾，汁還汁，蓮藕還蓮藕，我同老公都覺得no。

日本產地直送野菜藍入面最出色係個兩片切得薄薄既紫薯，又甜又香又好味，另外一梳梳既「菇」都好味，其他蔬菜就無乜特別。

佐賀A5牛肉眼同安格斯肥牛肥瘦適宜，油脂分布平均，入口夠淋，肉香不膩，真係多多都食得落。

黑松露龍蝦煲仔飯又係另一「不得了」之作，佢賣238，大大煲上檯，一揭開見到係原隻龍蝦份量，下面係芋頭煲仔飯，加埋黑松露既獨特誘人香味，真係令人好難抗拒，明知食得多會肥都忍唔住食左兩碗，連歲半既牽牽都唔執輸，食完又再添。龍蝦份量確實多到有啲出奇，老公海鮮怪真係滿足到一個點，龍蝦肉鮮且彈牙又厚肉，呢個價錢絕對超值。

飲品方面亦相當出色，而且一啲都唔貴，我地點左椰子沙冰同菠蘿沙冰，兩杯都香甜解渴，飲得出係用真生果處理，真材實料，係真.好味（≧∇≦）32蚊杯真心正。

最後再叫左甜品椰皇布甸，又係個句「不得了」入口清甜爽口，啖淡都有椰皇肉我覺得佢質感似jelly與大菜糕之間，一啲都唔似平時軟軟，一入口就吞到既布甸質地（唔明點解叫布甸）。

食物實係大部份都無得彈架喇，不過有一點希望會留意下就係無bb櫈提供，當日我地坐一邊卡位，一邊櫈位，坦白，對於有小朋友既家長真係唔太方便，全程一定要有個大人夾實個小朋友，即兩個大人去就一定只可以一個打邊爐，因另一個要攬實個小朋友，好似牽牽咁，無bb櫈困住坐，坐唔定佢就成日扭要周圍行周圍玩，又想沿梳化行過人地張檯；畢竟呢到都有大檯可以供應比一大班朋友黎，有時都會帶小朋友黎嘛，如果有bb櫈真係會好好多。

四季文昌

地址 : 旺角荔枝角道33號百匯軒地下及1樓全層

電話 : 2499 2700

萬寧、Watsons都買到～BabyBioxtra 益齒幼齒牙膏

做媽咪究竟有幾多野要擔心？真係做過先會知，由出世到牽牽而家21個月，我發覺自己真係每期擔心既野都唔同，岩岩出世時，見佢嘔奶驚會濁死佢，到識轉身喇，又驚佢會伏係到訓抖唔到氣、又驚佢會碌落地，以為而家大少少會擔心少啲啦，最近我就開始擔心佢啲牙仔喇，雖然好多人都話乳齒之嘛，第時會換牙唔驚啦，但講緊係起碼六、七歲先換，仲有好幾年喎，唔擔心就假喇。

有小朋友既人應該都有呢個經驗，幫佢地刷牙簡直係討厭既事，因為佢地多數都好唔合作，明明幾分鐘做完既事，永遠都起碼十幾分鐘先完成，仲要下下又鬧又氹

的確牽牽肯自己刷牙架，但佢仲咁細，我唔信會刷得乾淨囉，所以每次等佢自己刷完

我再幫佢刷，真係要攪成半個鐘。為左令牽牽提高刷牙既興趣，我買過好多款唔同既牙刷牙膏比佢。

最近係萬寧就買左呢隻 BabyBioxtra 牙膏比牽牽用

透明啫喱狀

盒上說明係蘋果香蕉味，我就覺得唔太似，我只覺得係入口酸酸甜甜果味（每樣比牽牽食、用既野，我都會自己試左先，咁先瞭解阿仔用緊乜架嘛）；

我覺得牽牽幾鍾意呢隻牙膏，因為佢成日都會啜，成日啜擺到明就覺得好味道啦(￣∇￣)（小朋友食牙膏我諗都幾常見，所以不含氟係極之重要），攪到我每幫佢擦都要補兩三次牙膏（我諗用多無所謂卦）

都講過啦，牽牽其實係好主動自己擦牙架，不過我一定會再幫佢擦多次之嘛

每次都係佢擦又要唧牙膏

我幫佢擦又唧，用量其實都唔少；我個人鍾意佢無用起泡劑，又唔會太稀，之前用過支台灣品牌既就會起好多泡，牽牽「bu」水又一時時喎，時「bu」時唔「bu」，飲水就咁吞又驚佢好似吞左好多泡泡咁；另有隻韓國品牌就好稀，次次唧親出黎都會漏左好多，好浪費。

最鍾意 BabyBioxtra 呢隻係萬寧，watsons藥房部都買得到，超方便，我住粉嶺唔使下下都要去到啲百貨公司嬰兒部先買到，good～不過佢係Aeon、一田、永安都一樣有得賣。

2016年9月20日星期二

全職媽咪找回專屬自己空間～Sudio VASA BLÅ 系列無線藍芽耳機

謝謝Sudio讓我重拾久違了的享受機會～

我，其實真係好鍾意聽歌～

當全職媽媽後，基本上自己既興趣都要放埋一邊，唱歌、聽歌、整蛋糕、研究食譜、煮特別餸等⋯全部都做唔到，始終湊小朋友真係要打醒十二分精神，睇少一眼都可能有意外，既然決定帶佢黎呢個世界，就要盡自己能力照顧佢、保護佢；雖然所有自己既興趣都要放埋一邊，不過我覺得值，小朋友大得好快，好快就唔痴我架喇，我好享受而家同牽牽相處既每分每秒，雖然攰、不過快樂。

至於興趣嘛，慢慢「攝」下就會有時間做到，就好似用Sudio既無線藍芽耳機，我就可以趁仔仔訓左後，還自己一個寧靜享受既音樂世界（我真係好鍾意自己好似同出面兩個世界既感覺（≧∇≦）Sudio藍芽耳機隔音真係好正～）

來自瑞典的 Sudio VASA BLÅ 系列無線藍芽耳機設計簡約、輕巧方便，只得14g，而且仲有我至愛既粉紅色，單睇外形已經吸引我，試聽後更即時愛上，音色立體、清翠俐落，隔音一流～

特別係我夜欄人靜時，望住窗外，好似置身係一個專屬自己既世界一樣，而且就算牽牽突然醒，由於藍芽耳機無線牽住，我都可以即時走埋去安撫佢，或者餵佢飲奶奶，完全唔使好似用有線耳機咁，又要放底電話、除耳筒先可以照顧牽牽。

另外，仲可以當無線hand free使用，真係極之適合我湊牽牽出街時使用，無論係推bb車時、抑或抱住佢時都可以輕易聽到電話，無線牽住真係超方便。

除左藍芽耳機粉紅色外，仲配備型仔同色皮套，免卻有線耳機打結麻煩，存放非常方便。10分鐘就已經可以快速充電，真係臨時臨急先醒起，都趕得切充。VASA BLÅ 系列無線藍芽耳機接駁同使用方法都非常簡單，只要按住開關制7秒，藍紅燈著左就可以預備connect，電話一開藍芽，幾秒就接駁到（iphone7都一樣相容到架），按鍵遙控除左可以聽電話之外，仲有跳選和回播歌曲功能。

適用於 iOS / Android 系統，盒內有多國語言說明書