商場有水玩^^置富‧Monchhichi‧夏日水上嘉年華

做左媽咪先發現，原來暑假香港各大商場都有好多節目，務求吸引家長們帶小朋友一齊去消費。呢排唔係落雨就熱到癲，對家長黎講，去商場涼冷氣絕對係最佳選擇，但係室內太多，其實對小朋友都唔健康，始終吸收下陽光，流下汗先係小朋友最想既活動，夏天就更加應該玩下水，估唔到竟然係商場都做得到。

沙田置富第一城今年攪左個*置富‧Monchhichi‧夏日水上嘉年華*，只要指定日期係商場消費港幣150元以上，就可以換領遊戲劵一張，家長係冷氣商場消費，小朋友可於商場中心玩水消暑，一個商場滿足晒大人細路兩邊要求。

牽牽而家91cm，岩岩fit到入場玩既要求（90-120cm）始終牽牽仲細，一開始緊係玩啲小小朋友既「波波池樂園」熱下身先啦。

仲以為牽牽會驚「撐船仔」，叫定工作人員幫手照顧下，點知佢一上船仔自己即攪手柄出船，完全唔使人幫喇，開心到呢～原來佢比我想像中大膽。

唔好睇條水滑梯好似好簡單咁，原來佢個名真係無改錯架，「極速水滑梯」真係瀡得超快，牽牽係岩岩夠高入場既細粒小朋友，一瀡就成個人浸晒落水，佢極速起身話有啲驚，但幾秒後又即話玩其他喇（≧∇≦）

「水上飛鏢」牽牽玩得勁開心，企係外面陪佢玩既我都好想落去玩埋一份。

「夏日釣魚樂」算係最最溫和既一個遊戲，如果未夠90cm就可以玩呢個。

「滾筒水上飄」對牽牽黎講太刺激喇，所以我地無玩喇。

去「開心照相區」同monchhichi say hello，影埋相後就去換雪條喇。

玩完爸爸大人去黃大仙教拳，我同牽牽就去旺角搵婆婆，商場旁邊就有巴士直到，好方便。

沙田置富第一城個商場有好多食肆，商鋪亦唔少，交通仲幾方便，難得可以係商場中心玩水，我覺得都值得特登入去，不過要留意換遊戲劵時間，同記得幫小朋友帶泳衣、毛巾同拖鞋呀（≧∇≦）

活動：置富‧Monchhichi‧夏日水上嘉年華
日期：7月27、28、29、30及8月3、4、5、6日
地點：沙田置富第一城（港鐵第一城站C 出口）
時間：第一節換領遊戲卷時間：10:45
　　　第一節活動時間：11:00 – 13:40
  第二節換領遊戲卷時間：13:45
  第二節活動時間：14:00 – 17:00

參加方法：凡於置富第一城內即日消費滿$150或以上，即可換領夏日水上嘉年華遊戲券一張，免費參加水上遊戲項目。
*每套發票只可換領一張遊戲券，每人每次最多可換領遊戲券2張，遊戲券數量有限，送完即止。

水上遊戲項目：極速水滑梯、滾筒水上飄、撐船仔、波波池樂園、開心照相區、水上飛鏢、夏日釣魚樂、攤位遊戲、沙畫工作坊、充氣彈床
*其中攤位遊戲日期為：7月29-30日
沙畫工作坊日期為：7月30日
充氣彈床日期為：8月5-6日

#置富 #monchhichi #夏日水上嘉年華 #置富第一城 #水上樂園